04.12.2025, 11:16 218
- Qarabağ və Şərqi Zəngəzur bölgəsi yüz illər boyu Azərbaycan mədəniyyətinin, incəsənətinin və musiqisinin beşiyi olub. 44 günlük Zəfər sayəsində bu ərazilərin mədəniyyət ocaqlarına nəzarət bərpa edildikdən sonra, onların qeyri-maddi irsinin yenidən dirçəldilməsi, sənədləşdirilməsi və gələcək nəsillərə çatdırılması məsələsi Mədəniyyət Nazirliyinin əsas prioritetlərindən birinə çevrilmişdir.
Bu münasibətlə Azərbaycan Respublikası Mədəniyyət Nazirliyinin təşkilatçılığı ilə Beynəlxalq Muğam Mərkəzində (BMM) dəyirmi masa keçirilib.
Tədbirdə müvafiq qurumların nümayəndələri, sahə üzrə ekspertlər iştirak ediblər. İki bölmədə təşkil olunan tədbirdə əvvəlcə “Azərbaycanın qeyri-maddi mədəni irsinə köklü baxış: regionlarımız ənənələrimizin beşiyi kimi” mövzusu ətrafında çıxışlar dinlənilib.
Tədbirdə növbəti bölmə isə 44 günlük Vətən müharibəsində şanlı Zəfərimizin 5 illiyi münasibətilə “Qarabağ və Şərqi Zəngəzurun qeyri-maddi mədəni irsi” mövzusuna həsr olunub.
Müzakirələr Qarabağ və Şərqi Zəngəzur irsinin qorunması sahəsində qarşıda duran vəzifələrlə bağlı təkliflər səsləndirilib.
Qeyd edək ki, UNESCO Baş Konfransının 2023-cü ildə (7-22 noyabr) Parisdə keçirilən 42-ci sessiyasında 17 oktyabr tarixi Beynəlxalq Qeyri-Maddi Mədəni İrs Günü elan edilib.
Hazırladı: Mina RƏŞİD
