10.04.2026, 10:18 126
- Ötən ilin mayında istifadəyə verilmiş Laçın Hava Limanında sərhəd nəzarəti sistemlərinin quraşdırılması ilə hazırlıq işləri yekunlaşıb.
"Vətən səsi" xəbər verir ki, bununla bağlı Daxili İşlər Nazirliyinin Baş İnformasiya Kommunikasiya İdarəsi tərəfindən keçirilən tender müsabiqəsi başa çatıb. Tenderin predmeti Laçın Hava Limanında “Giriş-çıxış və qeydiyyat” İAMAS çərçivəsində sərhəd nəzarəti və sənəd fərdiləşdirmə sistemlərinin quraşdırılması üçün avadanlıq, lisenziya və proqram-texniki təminatın satın alınması olub. Müsabiqənin qalibi “Digismart Tech” MMC olub. Həmin şirkətlə imzalanmış satınalma müqaviləsinə əsasən, analoji nəzarət sistemləri Xankəndi şəhərində də qurulacaq. Bunun üçün qalib şirkətə 1 milyon 844 min 622 manat köçürülüb.
Xatırladaq ki, Laçın Beynəlxalq Hava Limanı rayonun Qorçu kəndində yaxınlığında inşa olunub. Tikintisi 4 ilə yaxın davam edən hava limanı Laçın şəhərindən 30, Şuşadan 70, Kəlbəcərdən isə 60 kilometr məsafədə yerləşir. Təməli 2021-ci ildə avqustun 16-da Prezident İlham Əliyev və birinci xanım Mehriban Əliyeva tərəfindən qoyulan aeroportunun rəsmi açılış mərasimi 2025-ci il mayın 28-də keçirilib.
Elxan SALAHOV
