01.03.2023, 12:11 407
- Canlarından keçməklə millətin qəhrəmanlıq dastanını, azadlığını canı ilə qazanıb qanı ilə yazanlardır şəhidlər. Qəhrəmanlar zəncirləri qıraraq, zülmətləri yararaq, bizi işıqlı sabaha aparan, ölümləri ilə ölməzlik qazanan, əbədiyyətə qovuşmuş bəxtiyarlardır.
Bu qəhrəmanlardan biri də şəhid Ramin Zeynalovdur. Zeynalov Ramin Yasən oğlu 2000-ci ilin martın 1-də Ağdam rayonunun Qiyaslı kəndində məcburi köçkün ailəsində anadan olub.
Sonra ailə Ağdam rayonunun Baharlı qəsəbəsində məcburi köçkün ailələri üçün tikilən 2 otaqlı evlə təmin olunub.
O, orta məktəbi bitirdikdən sonra Ağdam Dövlət Sosial İqtisad kollecinə daxil olub. Kolleci bitirən Ramin 2020-ci ilin iyul ayında həqiqi hərbi xidmətə çağırılıb. Vətən müharibəsi başlayanda bütün vətənpərvər oğullar kimi 3 ayın əsgəri olan Ramin də döyüşlərə qatılıb. Murovdağ istiqamətində döyüşən Ramin yaralanıb hospitala gətirilib. Yaralı olmasına baxmayaraq, yenidən döyüş bölgəsinə əsgər yoldaşlarının yanına qayıdıb. Oktyabrın 19-da Murovdağ istiqamətində gedən döyüşlərdə qəhramanlıqla şəhid olub. Oktyabrın 20-də Ağdam rayonunda şəhidlər xiyabanında dəfn edilib.
Ölümündən sonra Azərbaycan Respublikası Prezidentinin müvafiq sərəncamları ilə "Hərbi xidmətlərə görə", "Vətən uğrunda", "Kəlbəcərin azad olunmasına görə" medalları ilə təltif olunub.
Tahirə AĞAMİRZƏ
