17.05.2025, 21:00 143
- Bu gün dövlət ümumi təhsil müəssisələrinin IV siniflərində keçirilən monitorinqdə Qarabağ Regional Təhsil İdarəsi üzrə 9147 nəfər şagird iştirak edib.
IV siniflərin monitorinqi ilk dəfə olaraq işğaldan azad olunmuş Ağdam rayon Sarıcalı, Ağdərə rayon Həsənriz, Suqovuşan kənd və Xankəndi şəhər Nizami Gəncəvi adına 4 nömrəli tam orta məktəblərdə də keçirilib.
Monitorinq tədris dili və riyaziyyat fənləri üzrə aparılıb. Monitorinqin nəticəsi şagirdlərin summativ qiymətləndirmə ballarına, eləcə də onların sinifdən-sinfə keçmələrinə təsir göstərmir.
Monitorinqin keçirilməsində məqsəd şagird nailiyyətlərinin yaxşılaşdırılması, məktəblilərdə müvafiq standartlar üzrə bilik və bacarıqların hansı səviyyədə formalaşdığının müəyyən edilməsi və tədrisin keyfiyyətinin artırılması istiqamətində tədbirlərin görülməsidir. (AZƏRTAC)
