08.05.2025, 10:51 226
- Ədalət hələ müharibədən əvvəl döyüşə özünü hazır sayırdı. Bunu atasına da söyləmişdi. Demişdi ki, müharibə başlayanda mən də, gedəcəm. Ədalət sözünün üstündə dayandı və Vətən müharibəsi başlayan kimi könüllü döyüşlərə qatıldı. O, cəbhədən atası ilə danışanda deyirdi ki, narahat olmayın, qələbə bizim olacaq. Döyüşlərdə iki dəfə yaralansa da yenidən cəbhəyə qayıtdı. Ancaq son dəfə qələbə anında aldığı yaradan şəhadətə ucaldı. İndi atası onunla fəxr edir. Onun yeganə arzusu odur ki, övladının adı əbədiləşdirilsin. Şəhid atası deyir ki, torpaqlarımızın azadlığı uğrunda canlarını fəda edən oğullar heç vaxt unudulmayacaq...
Bu gün Şanlı Vətən Müharibəsinin qəhrəman şəhidi Hüseynli Ədalət Səadət oğlunun doğum günüdür. O, 8 may 1992-ci ildə Cəlilabad rayonunun Fərəcullalı kəndində anadan olub. 2000-2010-cu illərdə Cəngan kənd tam orta məktəbində təhsil alıb. 2010-2011-ci illərdə N saylı hərbi hissədə xidmət edib.
29 sentyabr 2020-ci ildə Vətən muharibəsinə könüllü olaraq qatılıb. Füzuli, Qubadlı, Cəbrayıl istiqamətində gedən döyüşlərdə mərdliklə vuruşub. İki dəfə yaralansa da, yenidən döyüşlərə qatılıb. 8 noyabr 2020-ci ildə Qubadlıda yaralı yoldaşını çıxararkən ağır yaralandı. 4 dəfə əməliyyat keçirməsinə baxmayaraq, 21 dekabr 2020-ci ildə şəhidlik zirvəsinə ucaldı.
Azərbaycan ərazilərinin işğaldan azad olunması zamanı döyüş tapşırıqlarını uğurla yerinə yetirdiyinə, düşmənin əsas qruplaşmalarının məhv edilməsi ilə qoşunların döyüş qabiliyyətinin qorunub saxlanılmasında fərqləndiyinə görə Azərbaycan Prezidenti İlham Əliyevin müvafiq sərəncamlarına əsasən Ədalət Hüseynli "Cəsur döyüşçü", "Cəbrayılın azad olunmasına görə", "Qubadlının azad olunmasına görə" və "Vətən uğrunda" medalları ilə təltif edilib.
Cənnətdəki doğum günün mübarək, məzarın nurla dolsun, ruhun şad olsun, qəhrəman şəhidim!
Mina RƏŞİD
