• Firavan Məmmədova 1982-ci il mayın 29-da Şəki şəhərində anadan olub. 1999-cu ildə Şəkidə ərəb təmayüllü 18 saylı orta məktəbi bitirib.

2000-2004-cü illərdə Azərbaycan Dövlət Universitetində bakalavr təhsili alıb, 2010-2012-ci illərdə ümumi dilçilik ixtisası üzrə magistr dərəcəsi qazanıb. “Jalə sevgisi” adlı şeirlər kitabının müəllifidir. Hazırda Xırdalan şəhərində 2 saylı orta məktəbdə ingilis dili müəllimi kimi fəaliyyət göstərir. Firavan xanımın Vətən, Qarabağ sevdalı şeirlərindən “Vətən səsi”nin oxucularına ərmağan edirik.  

 

BAYRAQLAR SAVAŞINDA

 

Bu müzəffər ordunun

Vətənində daş olmaq,

Beli bükülmüş atanın

Gözündəki yaş olmaq,

Şəhidimin bəzənməmiş

Xonçasında qaş olmaq,

Qanla yazılmış zəfərə

yol olmaq, yoldaş olmaq,

Bu tale yazıldı bizə

Gedən haqq savaşında,

İgidlərin tarix yazdı

Bayraqlar savaşında!

 

İGİDİM

 

Qar altında yatan igid

Gözlərini bu dünyadan,

Sevdiyindən, balasından çəkən igid!

De, bu yolçuluq haraya,

Uzun-uzun yol gedirsən,

Sevincindən hey uçursan...

Bəlkə dönüb bir baxasan

Sənin üçün gözlərinin giləsini

hey doldurub boşaldana,

Qəmli-qəmli yollarına

Dikilib mat qalanlara.

Dönsən bizə nə deyərsən?!

Yenə bizi düşünüb sən

Bir qəhrəman ədasıyla

Əmr verib tapşırarsan:

"Mənə görə sən ağlama,

Heç vaxt mənə yas saxlama!

Necə ki, mən mərd baxmışam

Qarşımdakı ölüm adlı

Yollarımı ayırana.

Dedim sənə: "Bu son deyil,

Səni burda gözləyəcəm

Salam yayıb qovuşmağa!"

 

 

KƏDƏRİ GÖZÜNDƏ GİZLƏDƏN QADIN

 

Kədəri gözündə gizlədən qadın,

Qəmdən ürəyini sızladan qadın,

Bir qara buludu dalınca salıb,

Çiçək yanağından öldürən qadın.

 

Bu qəmi, kədəri büküb örpəyə,

Qəlbinə daş yumaq bağlayacaqsan.

Bu qəmi, kədəri verib bir yelə

Xəfif yel əsdikcə ağlayacaqsan.

 

Bu qəmin, kədərin içində yenə

Gülüş qondurursan nəmli gözünə,

 Bu qəmi, kədəri yaşayanlardan

Utanıb tapmırsan macal özünə.

 

Sən ağır yükləri alıb çiyninə

Yenə gedəcəksən sabaha sarı,

Sənə ümid verən ümidlər yenə

Alıb bir aparsa sabaha barı.

 

Sabahlar aydınlıq, sabahlar işıq.

Qəmli gözlərinə nur çiləyəcək,

Səni səndən alan bu dərd, bu kədər,

Ümid çeşməsi tək çiçəkləyəcək.

 

TƏNHA ŞƏHİD MƏZARI

 

Bir tək şəhid məzarı yolun kənarın kəsib,

Ayparanın kölgəsi məzarına hay verib.

Bir ananın müqəddəs qüruru, ya harayı

Bu məzarı yüksəldib edib tarix sarayı!

 

Qulaq ver bu torpağa, duyacaqsan səsini,

Sənə danışcaqdır başına gələnləri.

Min şəhidə şahidlik edir bu tənha məzar,

Yaşatdığı bu birlik tək amala söykənib

Tarix boyunca uzar...

 

Bu tək şəhid məzarı səfərbərlik dərsidir,

Bir tək amal uğrunda

Baş qoyduğu minlərlə

Şəhidin kölgəsidir!

 

Hazırladı: Mina RƏŞİD