06.11.2022, 15:00 696
- “Qarabağ zəfəri elə bu gün də Azərbaycanın hərb tarixinin ən böyük qələbəsi sayılır. Azərbaycan bu qələbəni özündən qat-qat zəif Ermənistan üzərində deyil, onun çox güclü havadarları olan dünyanın güc mərkəzləri ilə uzunmüddətli, inadlı, gərgin və mürəkkəb mübarizədə qazanıb. Tarixdə Azərbaycan heç vaxt bu qədər düşmən qüvvə ilə təklikdə üz-üzə qalmayıb. Bu qələbənin böyüklüyü və misilsizliyi də bütün bunlarla müəyyən olunur. Qarabağ zəfəri davamlı mübarizənin, qəti bir dirənişin nəticəsi oldu”.
Milli Müdafiə Universiteti Hərbi Elmi-Tədqiqat İnstitutunun professoru, tarix elmləri doktoru Mehman Süleymanov bunu “Xalq qəzeti”nə müsahibəsində deyib. O qeyd edib ki, ay yarım davam edən əks-hücum əməliyyatları nəticəsində Ermənistana, faşist mahiyətli dünya erməniliyinə və onların havadarlarına elə bir dərs verildi ki, bölgədə tamamilə yeni bir reallıq yarandı. “30 il ərzində davam edən işğala susqunluqla yanaşan çox böyük qüvvələr Azərbaycan xalqının iradəsi qarşısında diz çökməyə məcbur oldu və bu qüvvələrin heç yuxularında belə təsəvvür edə bilməyəcəkləri bir tarixi mənzərə ortaya çıxdı. Azərbaycan xalqı və onun iradəsini ifadə edən müstəqil dövləti gücünü və qətiyyətini toplayaraq öz ərazilərini erməni işğalından azad etdi, fərqli bir dünya düzəni yaratmaqla yeni bir tarix yazdı,” – deyə alim fikrini bildirib.
