• Son illər beynəlxalq münasibətlər sistemində bir sıra siyasi institutların və təşkilatların nüfuzu artmaqdadır. Onlardan biri də Şanxay Əməkdaşlıq Təşkilatıdır. Həm ərazisinə, həm də əhalisinə görə dünyanın ən böyük ölkələrindən bir neçəsinin üzv olduğu Şanxay Əməkdaşlıq Təşkilatının əsas məqsədləri üzv dövlətləri arasında qarşılıqlı edimad və qonşuluq münasibətlərinin gücləndirilməsidir. Siyasət, iqtisadiyyat, texnologiya, mədəniyyət, təhsil, enerji, nəqliyyat və digər sahələrdə səmərəli əməkdaşlığın inkişaf etdirilməsidir. Regionda sülh, təhlükəsizlik və  sabitliyin əldə edilməsi üçün birgə səylərin göstərilməsi, yeni siyasi və iqtisadi beynəlxalq düzənin yaradılması üçün addımların  atılması da təşkilatın prioritetlərindəndir. Azərbaycan hazırda Şanxay Əməkdaşlıq Təşkilatında dialoq tərəfdaşı statusuna sahibdir. 2016-cı ildə tərəflər arasında əməkdaşlıq memorondumu imzalanıb. Əməkdaşlıq istiqamətləri arasında Azərbaycan üçün xüsusi əhəmiyyət kəsb edən  terrorizm, ekstremizim, separatizimlə mübarizə. Regional təhlükəsizliyin və sabitliyin təminatı müəyyənləşdirilib.

“Orta dəhliz, Zəngəzur dəhlizi kontekstində də Azərbaycan üzərindən yüklərin daşınması bu gün siyasi gündəlikdə olan  ən mühüm prioritetlərdən biridir”. Bunu politoloq İlyas Hüseynov mətbuata açıqlamasında deyib. O, bildirib ki, digər tərəfdən  dövlət başçıları arasında müntəzəm görüşlər, dialoqlar və  təmaslar da  nəzərdə tutulmuşdur: “Artıq bu dialoq baş verir,  müşahidə olunur və dialoq çərçivəsində həm ikitərəfli, həm  də çoxtərəfli müstəvilərdə və geniş coğrafiyalarda əməkdaşlıq kontekstində məsələlər müzakirə olunmaqdadır”.

Təşkilatla əməkdaşlığını uğurla inkişaf etdirən Azərbaycan müşahidəçi statusu almaq niyyətindədir. Prezident İlham Əliyevin uzaqgörən siyasəti nəticəsində sürətlə inkişaf edərək regionda ən nüfuzlu dövlətə çevrilən Azərbaycanın Şanxay Əməkdaşlıq Təşkilatında müşahidəçi statusu alması bu qurum üçün də böyük önəm daşıyır. Çünki Azərbaycan  gənc, müstəqil dövlət olmasına baxmayaraq, özünü bütün dünyada möhtəbər beynəlxalq tədbirlərə uğurla rəhbərlik edən ölkə, qlobal səviyyəli məsələlərin müzakirə olunduğu mühüm platforma kimi sübut edib. Prezident İlham Əliyevin Astana sammitində iştirakı Azərbaycan COP29-la bağlı mesajlarının çatdırılması, səmərəli müzakirələrin aparılması baxımından da çox əhəmiyyətlidir.

Tahirə AĞAMİRZƏ