22.04.2026, 10:41 215
- İşğaldan azad edilmiş ərazilərdə məskunlaşan vətəndaşların sosial rifahının yüksəldilməsi və onların məşğulluğunun təmin edilməsi dövlət siyasətinin prioritet istiqamətlərindən biridir. Bu çərçivədə, doğma yurdunda məşğulluğu təmin edilən şəxslərdən biri də ailəsi ilə birgə Cəbrayıla köçən və dövlətin dəstəyi ilə yeni peşəyə yiyələnərək çalışmağa başlayan Gülhüseyn Bayramovdur.
Bayramov Gülhüseyn Vidadi oğlu 1990-cı ildə Cəbrayılda anadan olub. O, uşaq yaşlarında rayonu tərk etməyə məcbur qalsa da, qəlbində hər zaman qayıdış ümidi yaşatdığını bildirir: “Cəbrayıldan ayrılanda yaşı az olduğu üçün yadımda heç nə qalmayıb. Amma ailədə həmişə doğma Cəbrayılla bağlı xatirələr dinləmişəm. Bütün ailəmiz inanırdı ki, biz bir gün öz yurdumuza geri dönəcəyik. 2020-ci ilin 27 sentyabrında başlanan şanlı Vətən Müharibəsində torpaqlarımız bir-bir azad olunduqca biz də sevinir, Cəbrayılın adını səbirsizliklə gözləyirdik. Nəhayət bir gün Cəbrayılın işğaldan azad edildiyi xəbərini ailəmiz böyük bayramla qarşıladı...”
2025-ci ilin yanvar ayında Gülhüseyn ailəsi ilə birgə doğma Cəbrayıla qayıdıb və öz ata-baba yurdunda mənzillə təmin edilib.
Cəbrayıl sakini deyir ki, mən iş üçün Dövlət Məşğulluq Agentliyinə müraciət etdim. Onlar məni 3 aylıq kursa cəlb etdilər. Kursu bitirib işlə təmin edildim. Artıq 7 aydır ki, mən qaz təsərrüfat nəzarətçisi işləyirəm. Mənim üçün çox xoşdur ki, öz rayonumda həm yaşayır, həm də işləyirəm.
Mina RƏŞİD
