24.03.2022, 10:00 265
Nizami Gəncəvi Beynəlxalq Mərkəzinin (NGBM) nümayəndə heyəti Ukraynadakı qaçqın böhranının həllində Moldovanı dəstəkləmək üçün Kişinyovda səfərdədir. Səfər martın 23-də başlanıb və 25-dək davam edəcək.
NGBM-in Moldovada səfərdə olan nümayəndə heyətinin tərkibi belədir: Zlatko Laqumdziya, Bosniya və Herseqovinanın Baş naziri (2001-2002), 1993-1996, 2012-2015 Baş nazirinin müavini, Petre Roman, Rumıniyanın Baş naziri (1989) -1991), parlamentin spikeri 1996-1999, Eka Tkeşelaşvili, Gürcüstan Baş nazirinin müavini (2010-2012), 2008-ci ilin xarici işlər naziri; Rövşən Muradov, Nizami Gəncəvi Beynəlxalq Mərkəzinin baş katibi.
Beynəlxalq nümayəndə heyəti 3 gün ərzində Kişinyovda ukraynalı qaçqınlar üçün bir neçə sığınacaq, habelə qida və gigiyena məhsullarının paylanması üzrə anbarları ziyarət edəcək. Bundan başqa, nümayəndə heyətinin Moldova Respublikasının Baş naziri, sosial müdafiə naziri, parlament sədri, xarici işlər naziri ilə işgüzar görüşləri nəzərdə tutulub.
Xatırladaq ki, Nizami Gəncəvi Beynəlxalq Mərkəzi (NGBM) ən yüksək səviyyədə dialoq və konstruktiv müzakirələr yolu ilə dünyada anlaşma, sülh, firavanlıq, qlobal problemlər və çağırışlar üzrə məsləhətləşməni təşviq edən, Azərbaycanın paytaxtı Bakı şəhərində yerləşən beynəlxalq təşkilatdır. Təşkilatın nümayəndələri Bakıda keçirilən illik tədbirlə (Qlobal Forum) yanaşı, Çin, ABŞ, Yunanıstan, İtaliya, Belçika, Misir, Latviya, Bosniya və Herseqovina, Bolqarıstan, Ukrayna və bir çox başqa ölkələrdə müntəzəm regional səfərlər həyata keçirirlər.
