• “Bu gün Ermənistanda gedən proseslər həm dövlət səviyyəsində, həm  də ictimai-siyasi sferada bir yox, bir neçə mərkəzdən idarə olunur. Burada Rusiyanın öz maraqları var,  Qərbin, Avropa İttifaqının  maraqları var və Ermənistan üzərində toqquşan hər iki tərəfin  öz siyasi dayaqları var Ermənistanda”.

Bu fikirləri ARB24-ə açıqlamasında siyasi şərhçi Sahil Kərimli deyib.

Politoloq qeyd edib ki, bu baxımdan da radikalların, revanşist və terrorçu meyilli təbəqənin də öz irdarəçiləri var. Təbiidir ki, bu  idarəçilər həm Rusiyada oturub, həm Qərbdə, Avropada oturub və onlar  xüsusi peşəkarlıqla  bu radikalları idarə etməyə çalışırlar. Onlardan Azərbaycana  qarşı bir vasitə kimi istifadə etməyə çalışırlar. Bütün bunların fonunda isə bu gün  Ermənistanda cəzasızlıq prinsipi hökm sürür: “Paşinyan hakimiyyəti nədənsə radikallara və revanşistlərə qarşı  sərt tədbirlər həyata keçirmir. Əgər belə  olmasaydı, həmin şəxslər bu gün İrəvanın mərkəzində əllərini, qollarını sallayaraq rahat şəkildə bu cür mənfi meyilləri həyata keçirə bilməzdilər. Burada biz radikalizmdən, terrorçuluqdan, separatizmdən danışırıq və təbiidir ki,  əgər həmin şəxslər, həmin  qüvvələr bu gün  Ermənistanda vəziyyəti qarışdırmağa cəhd göstərirlərsə, kütləvi etiraz aksiyaları keçirirlərsə, Azərbaycana qarşı ərazi iddialarında yenə də həvəsə düşüblərsə və Azərbaycanı təxribatlara sürükləməyə cəhd edirlərsə, təbii ki, bu, Ermənistan hakimiyyəti tərəfindən çox sərt şəkildə qanunla müvafiq qaydada cəzalandırılmalıdır. Amma təəssüf ki, biz bunu görmürük və bir növ Nikol Paşinyan necə ki, Ermənistan ordusuna da nəzarət edə bilmirdi. Çünki hər dəfə sülh çağırışları  verir, lakin eyni zamanda da paralel olaraq Ermənistan ordusu Azərbaycanla şərti sərhədlərdə Azərbaycana qarşı hərbi təxribatlar törədir, Azərbaycan mövqelərini atəşə tuturdular.  Bu istiqamətdə də Nikol Paşinyan orduya nəzarəti necə həyata keçirə bilmirdisə, bu gün də ictimai-siyasi proseslərə  ölkə lideri kimi hökm edə bilmir və həmin prosesləri qızışdırmağa çalışan  qüvvələrin də cəzalandırılmasına  nail ola bilmir”. Ekspert daha sonra əlavə edib ki, yəni  bütün proseslərə biz nəzər salsaq, görürük ki, Ermənistan üzərindən oynanan oyunlar yenə də davam edir: “Qərb, Avropa İttifaqı bu istiqamətdə yenə də öz canfəşanlığını göstərir.Ermənistanın silahlandırılması məlum məsələdir. Uzun müddətdir davam edən bir prosesdir, özü də bu proses Azərbaycanla birbaşa olaraq hərbi qarşıdurmaya hesablanmış bir prosesdir. Çünki əgər Ermənistan bu gün silahlandırılırsa,  hücum xarakterli silahlarla təchiz  edilirsə, bu o deməkdir ki, Qərb, Avropa İttifaqı dairələri elə Rusiyanın özündə də buna maraqlı olan qüvvələr var.  Cənubi Qafqazda sabitliyi pozmağa çalışırlar. Cənubi Qafqazda sülh və  təhlükəsiziyə çox ciddi  zərbə vurmaq istəyirlər”.

Tahirə AĞAMİRZƏ